Si Cebu City Mayor Nestor Archival nipahibalo nga ang inisyal nga eskedyul sa libreng night shuttle service, aron malikayan ang pagkompetensya sa mga public utility vehicles, magsugod gikan sa alas 9 sa gabii hangtod sa alas 5 sa buntag.
Sa sinugdan, ang kagamhanan sa siyudad mogahin og usa ka bus matag usa alang sa rota sa amihanan ug habagatan.
“Sugdan ni og usa o duha ka bus. Usa ka bus sa north, usa ka bus sa south,” matod ni Archival sa usa ka sideline interview niadtong Sabado, Hulyo 6, 2025, atol sa pilot waste segregation project sa Barangay Luz.
Dugang pa ni Archival nga ang shuttle gipunting alang sa mga empleyado sa Business Process Outsourcing-Information Technology (BPO-IT) sector nga nagtrabaho sa graveyard shifts.
“Ang eskedyul magsugod mga alas nuwebe hangtod padung sa alas 5 sa buntag. Aron dili sad ta makadiskaril sa mga sakyanan nga public utility vehicles, jeepney nga naa say musakay nila,” dugang ni Archival.
Gihatagan niya og gibug-aton nga ang programa kabahin sa paningkamot sa siyudad aron maprotektahan ang mga mamumuo nga huyang sa gagmayng krimen atol sa pagbiyahe sa gabii.
“Daghan kaayo og mga report atol sa graveyard hours—pagsakay, kuot, hold-up,” ingon niya.
“Kini makapabati nila nga giatiman sila sa city government,” dugang niya.
Gibutyag usab ni Archival nga ang inisyatiba gi-inspirar sa programa nga “Mayor of the Night” nga gipanamkon ubos sa kanhi Bise Mayor Tommy Osmeña.
Ang programa nagtumong sa pagsuporta sa gibanabana nga 250,000 ka BPO-IT workers sa Cebu, kansang kontribusyon mahinungdanon kaayo sa ekonomiya sa siyudad.
Kining lakang gisundan sa pag-aprobar sa Konseho sa Cebu City sa usa ka resolusyon niadtong Hunyo 26, 2024, nga gisulat ni Archival, nga nanawagan sa pagpabuhi sa libreng sakay sa bus alang sa mga empleyado.
Sa nasayran, ang bus nga gamiton alang sa libreng sakay gikan sa Barangay Labangon, Dakbayan sa Sugbo padulong sa IT Park ang gilusad na niadtong Hulyo 2. / CDF