GIBANABANA nga 20,000 ka pasahero nga adlaw-adlaw nga nagbiyahe sa Parkmall terminal ug Urgello sa Cebu City ang makapahimulos sa libreng transportasyon ubos sa Libreng Sakay Program.
Ang Cebu City maoy unang lugar sa Visayas nga nilusad sa maong programa diin ang napiling rota naglangkob sa labing busy nga mga lugar sa tri-cities, matod ni Transportation Secretary Vince Dizon atol sa kalihukan niadtong Hulyo 23, 2025.
Sigon niya nga ang rota moagi sa pito ka unibersidad ug upat ka malls nga nagtanyag og dako nga savings nga moabot og P200 matag semana alang sa mga estudyante ug trabahante.
Ang libreng sakay nag-operate atol sa peak hours sa alas 6:00 sa buntag hangtod alas 9:00 sa buntag ug alas 5:00 sa hapon hangtod alas 8:00 sa gabii matag adlaw, apil na ang mga holidays ug weekends.
Gisiguro ni Dizon nga ang tanang operators makadawat og income kay ang gobiyerno naghatag og P350,000 matag adlaw nga subsidy nga dunay gibanabanang budget nga P150 ngadto sa P160 milyunes. / DPC / Hulagway ni Juan Carlo de Vela