Aron pagpagaan sa pinansyal nga palas-anon sa mga ginikanan panahon sa pagbalik sa klase, gisugdan na sa Kagamhanan sa Dakbayan sa Mandaue ang pagpanghatag og libreng school supplies ug P.E. uniforms ngadto sa mga tinun-an sa tanang pampublikong eskwelahan sa elementarya.
Si Konsehal Malcolm San-chez, chairperson sa Committee on Education, niingon sa usa ka interview niadtong Lunes, Hunyo 9, 2025, ang pagpanghatag dungan sa pagsugod sa Brigada Eskwela.
“This is not yet the official launching. We began the distribution now because Brigada Eskwela has already started,” matod ni Sanchez.
Posibleng sa katapusan sa Hunyo himuon ang ceremonial turnover sa mga school supply human sa election ban.
Ang programa gipundohan og P80 milyunes sa Special Education Fund (SEF) sa siyudad ug gitumong aron makabenepisyo ang tanang 39,000 ka rehistradong tinun-an sa pampublikong elementarya sa Siyudad sa Mandaue.
Kini nga gidaghanon gibase pa sa datos sa enrollment sa katapusan sa School Year 2024-2025, ug mahimo pa nga mausab samtang nagpadayon ang enrollment.
“We don’t have the final numbers yet. Enrollment is still ongoing,” matod ni Edgar Espina sa administrative office sa Department of Education Mandaue Division.
Ang siyudad manghatag og kompletong set sa school essentials, lakip na ang mga bag, notebooks, pencils, writing pads, ballpens, raincoats, P.E. uniforms, ug uban pang batakang supplies.
Ang mga estudyante sa Kindergarten makadawat og specialized kits nga gipahaum sa ilang panginahanglan sa pag-eskwela.
Ang mga estudyante makadawat sa ilang school supplies sa higayon nga makakumpleto na sila sa enrollment, aron masiguro nga patas ang pagpanghatag.
“This program ensures that parents don’t have to worry or feel stressed about where to get school supplies for their children. It’s a concrete show of support from the city government, especially in the field of education,” sigon ni Sanchez.
Sa Mandaue City Central School, gipaambit ni Principal Louwela Guerrero kon giunsa pagpahigayon ang pagpanghatag. / CAV