GISUGYOT sa konsehal sa Siyudad sa Sugbo ang pagtukod og Legal Aid Office ug Barangay Legal Aid desks aron paghatag og libreng serbisyo legal alang sa mga kabus sa dakbayan.
Si Konsehal Mikel Rama, kinsa usa ka abogado, maoy nagsugyot sa usa ka ordinansa nga nagtumong sa pagmugna og usa ka City Legal Aid Office ug Barangay Legal Aid Desks.
Matod ni Rama nga kini nga inisyatibo nahiuyon sa mga mando sa Korte Suprema, sama sa Rules on the Unified Legal Aid Service (ULAS), nga nagkinahanglan sa mga abogado nga mohatag og labing menos 60 ka oras nga libreng legal aid matag tulo ka tuig.
Ang gisugyot nga mga lakang nagtinguha sa pagporma sa Cebu City Legal Aid Coordinating Committee (CLACC), nga maoy modumala sa pagpatuman sa programa.
Ang City Legal Officer maoy mangulo sa komite, uban sa mga representante gikan sa Integrated Bar of the Philippines - Cebu City Chapter, akreditado nga Clinical Legal Education Program (CLEP) law schools, ang Sangguniang Panlungsod Committee on Social Service, ang Department of Social Welfare and Services (DSWS), ug akreditado nga civil society organizations.
Ang mga Barangay Legal Aid Desks mohatag og walk-in nga tabang legal, intake services, ug referrals sa mga pilot barangay, uban sa mga plano alang sa pagpalapad niini sa tibuok siyudad.
Samtang ang CLEP ug Volunteer Lawyer Partnership Program makig-alayon sa IBP ug mga law school aron mapalihok ang mga pro bono nga abogado ug supervised law students.
Ang legal aid magamit sa mga indigent nga indibidwal o grupo, mga biktima sa pag-abuso, kapintasan, pagpanghasi, o pagbakwit, mga senior citizens, PWDs, ug uban pang mga huyang nga tawo.
Usa ka tuig nga pilot implementation sa programa ang giplano alang sa labing menos tulo ka barangay.
Ang CLACC mosumite og mga evaluation report sa Sangguniang Panlungsod. /EHP