Nagtanyag ang Dakbayan sa Talisay og libreng pag-survey o pagsukod sa mga luna nga mahimong tukoran og balay alang sa mga urban poor.
Ang presidente sa Federation of Talisay City Urban Dwellers Association (Fetcuda) Inc. Atty. Elycrisjoe dela Cuesta nibutyag nga kini maoy programa sa local housing sa siyudad alang sa socialized housing.
Kon masukod na ang luna, sayon na lang kaayo ang pag-ila kon pila ka mga balay ang matukod ug mapahimuslan sa mga miyembro sa urban poor.
Ang Fetcuda dunay 80 ka organisasyon sa mga homeowners ug urban poor sa Talisay nga gipatutokan ni Mayor Samsam Gullas sa local housing.
Matod ni Atty. Dela Cuesta nga ang mga sakop sa Fetcuda gitabangan sa kagamhanan sa siyudad aron makapangita og luna aron pirmanente nilang kapuy-an.
Gibutyag sab niya nga empowered ang mga sakop sa urban poor sa Talisay ug kanunay nga giedukar sa Fetcuda aron masayod sa ilang mga katungod.
Ang chairman sa committee on disaster preparedness sa konseho, Konsehal Danny Caballero gihangyo sab sa Fetcuda nga matudluan sila alang sa kalig-on ug pagpangandam panahon sa emerhensiya. / VLM