PATAY diha-diha ang usa ka lalaki nga libud suroy human ma hit and run ala 1:30 sa kadlawon, Biyernes, Hunyo 27, 2025 sa may dalan S. Osmeña, Carreta Extension North Reclamation Area, Barangay Carreta sa dakbayan sa Sugbo.
Ang biktima padayon pa nga giila sa pagkutlo ning balita sa mga personnel sa Traffic Enforcement Unit (TEU) sa Cebu City Police Office.
Una niini, ang buhatan sa TEU nakadawat og tawag sa telepono nga dunay naligsan sa maong lugar ug dali nila kini nga girespondehan.
Sa ilang pag-abot, nagbuy-od na ang biktima sa karsada ug migawas na ang tinai niini nga nagpasabot nga nalatayan kini sa ligid sa sakyanan.
Nanawag ang mga police personnel nga miresponde og ambulansya aron maoy mosusi sa lawas sa biktima.
Nangayu og CCTV footage sa Eagle Eye sa Cebu City Traffic Office ang mga imbestigador apan pakyas sila sa pag-ila sa sakyanan.
Hinuon, nagpadayon pa karon sa ilang imbestigasyon ang TEU. / AYB