Lider sa usa ka drug group nga naglihok sa Sugbo, ang nadakpan sa buy-bust sa mga sakop sa Philippine Drug Enforcement Agency (PDEA) 7 didto sa lalawigan sa Cavite.
Ang mga ahente sa PDEA 7 nakadawat og report labot sa presensya sa giila nga drug personality sa Sugbo nga naa sa Cavite, ila gilayon nga gilusad ang operation, alas 4:15 sa hapon, Sabado, Marso 16, 2024, sa pakig-alayon sa Amadeo Municipal Police Station, sa Talon Buho Road, Barangay Talon, Amadeo, Cavite.
Malampuson nga nadakpan si Aljon Chavez, 29, walay trabaho ug taga Barangay Loma, Amadeo, Cavite.
Nakuha gikan kaniya ang usa ka pack nga gituohang shabu nga motimbang sa 100 grams nga dunay estimated market value nga P680,000 lakip na ang buy-bust money, cellphone ug ang motorsiklo niini.
Duha ka buwan nga gipaubos sa case build up ang suspetsado human madawat ang impormasyon gikan sa kasaligang tinubdan.
Giingong makabaligya kinig 500 grams ngadto sa usa ka kilo nga shabu ang suspetsado sulod sa usa ka semana.
Ang iyang area sa pagpayuhot sa illegal nga drugas mao ang tibuok isla sa Sugbo lakip na sa Cavite ug mga silingan niini nga mga lungsod.
Matod ni Leia Alcantara, information officer sa PDEA 7, nga nadakpan na niadtong 2018 si Chavez sa dakbayan sa Sugbo.
Kasamtangan nga naa sa Tagaytay City Medical Center ang suspetsado tungod sa naangkon niini nga mga samad sa lawas human nisuway sa pagsibat gamit ang iyang motorsiklo.
Kalapasan sa Section 5, Article II sa Republic Act 9165 ang ipasaka nga kaso batok sa suspetsado. / AYB