Nadakpan na sa kapulisan sa Central Visayas ang giila nga lider sa pagpanulis sa Oro Sugbo Pawnshop nga nahitabo niadtong buntag sa Nobiyembre 25, 2023, sa dalan Colon, Dakbayan sa Sugbo pinasikad sa warrant of arrest nga giluwatan sa korte.
Ang nadakpan ug naa na karon sa Cebu City Jail giila nga si Jake Camotes, taga Dakbayan sa Carcar, Sugbo.
Matod ni Police Brigadier General Redrico Maranan, hepe sa Police Regional Office 7 nga si Camotes maoy lider sa usa ka robbery holdup group nga maoy responsabli sa pagtulis sa Oro Sugbo nga nisibat sa gibanabanang kapin P14 milyunes nga balor sa mga alahas.
Gawas kang Camotes, nadakpan sab ang laing tulo niini ka kauban nga nabalhog na sab sa Bureau of Jail Management and Penologoy.
Si Camotes dunay lima ka warrant of arrest nga giluwatan sa korte ug sa dihang nigawas na kini sa miaging semana, gi-serve sa kapulisan sa iyang panimalay sa Dakbayan sa Carcar.
Nigawas ang pangalan ni Camotes nga maoy lider sa nahitabong pagtulis sa Oro Sugbo human nga nadakpan ang iyang mga kauban.
Human mapasaka ang kaso magbalhin-balhin na siya'g puyo sa Carcar ug sa bukirang dapit sa Lungsod sa Sibonga apan nasigpatan ang iyang presinsya sa Carcar nga maoy hinungdan nga siya gidakop. / AYB