Nagpakatap si Damian Lillard og kaugalingon niyang season-high 43 puntos lakip na niini ang walo ka three-point shots aron agakon ang hosts Milwaukee Bucks sa daog batok sa Philadelphia 76ers, 135-127, ning Lunes, Pebrero 10, 2025 (PH time), sa National Basketball Association (NBA).
Nimugna sab og kaugalingon niyang season-high 23 puntos si Gary Trent Jr. samtang niamot og 18 puntos ug 12 rebounds si Bobby Portis alang sa Bucks, nga ningkombati sa ikaupat nga sunodsunod nga duwa nga wala ang usa sa ilang labing lig-ong mga haligi nga si Giannis Antetokounmpo.
Si Antetokounmpo, kinsa two-time MVP, padayong nagpaalim sa iyang angol (strained left calf).
Nagkanayon si Lillard nga kinahanglan niyang mokayod og insakto aron tabangan ang Bucks sa pagtapak sa dakong haw-ang nga nabiyaan ni Antetokounmpo.
“I think I’ve just got to assert myself more. When you’re on the floor with the best player in the league you’ve got to find ways to be effective,” matod ni Lillard.
“When he’s (Antetokounmpo) not out there, I’ve got to assert myself and play a game that’s very familiar to me.”
Sa kinatibuk-an, 24 ka three- pointers ang napasulod sa Bucks nga maoy labing daghan nilang nahimo sa usa ka duwa sa kasamtangang season.
Ang 76ers gipangulohan ni Tyrese Maxey pinaagi sa iyang 39 puntos, nihatag og 27 puntos si Joel Embiid samtang nitampo og 18 puntos si Guerschon Yabusele.
Grabe ka sikit ang engkuwentro sa 1st half diin sulod sa 22 ka mga higayon nga nagpulipuli paggunit sa labaw ang duha ka mga kampo.
Pagsugod sa 3rd quarter, hinayhinay na nga ningbiya ang Bucks hangtod nga niabot og 25 puntos ang ilang labaw nga maoy nag-abli og dako sa ilang pultahan paingon sa daog. / AP