Nalingaw ug napuno sa talento ang UV-Gymnasium, Biyernes, Mayo 24, 2025, atol sa variety show nga gipasiugdahan sa mga estudyante sa University of the Visayas–Main Campus isip kulminasyon sa ilang General Education nga subject nga Arts Appreciation.
Nagpakita ang mga 1st year college students sa ilang mga kahanas sa pagsayaw, pagkanta, pag-arte, ug uban pang mga porma sa sining.
Ang maong kalihukan naghatag higayon sa mga tinun-an nga ipadayag ang ilang artistic skills ug creativity nga ilang nakat-unan sulod sa semester.
Ang mga estudyante ubos sa klase nila ni Mr. Sherwin Kenh Tila-on, Dr. Daisy Compuesto, Mrs. Bebie Jane Casipong-Baya, ug Ms. Wenona Javier.
Ang show nag-focus sa pagtugot sa mga kabatan-onan nga ipakita ang ilang personal nga interpretasyon sa arte, ug sa samang higayon, sa pag-amuma sa ilang pagsabot sa kultura ug sining.
“Dili lang ni performance, kondili usa ka pagsaulog sa pagkat-on ug kolaborasyon,” matod ni Mr. Tila-on.
Ang maong variety show maoy timaan sa matag estudyante nga ang arte dili lang kutob sa papel, kondili usa ka buhing pamatuod sa ilang kahanas ug personalidad. (BJC)