'Linsanity' maabot sa Lapu-Lapu

'Linsanity' maabot sa Lapu-Lapu
Basketball (File Photo)

Ipahigayon ang semi-finals ug finals sa East Asia Super League (EASL) sa sunod buwan sa Hoops Dome sa Lapu-Lapu City.

Mismong si Lapu-Lapu City Mayor Junard “Ahong” Chan ang nikompirmar niini.

Matod ni Chan nga adunay organizers gikan sa Manila ang nakighugpong kaniya kabahin sa pag-host sa Lapu-Lapu City sa nahabiling pipila ka mga duwa sa EASL.

“Nakapa-reserve na sila og dates ug ako na man ning gi-approve,” matod ni Chan.

Niini, adunay kahigayunan ang Cebuano basketball fans nga personal makasaksi sa abilidad ni Taiwanese-American Jeremy Lin, kinsa maoy nagpasikat sa “Linsanity” dihang nagduwa pa kini sa National Basketball Association (NBA) ubos sa kampo sa New York Knicks.

Si Lin usa sa mga pambato sa New Taipei Kings sa Taiwan, usa sa upat ka semi-finalists.

Karong Marso 8, 2024 ipahigayon ang duha ka semi-finals games unya kombatihon ang inilugay sa ikatulong dapit ug championship game inig Marso 10, 2024.

Gawas sa Kings, ang ubang semi-finalists sa torneyo mao ang Chiba Jets sa Japan, Seoul SK Knights sa Korean Basketball League (KBL), ug defending champions Anyang Jung Kwan Jang Red Boosters sa South Korea.

Sa taho sa Spin.ph, si EASL CEO Henry Kerins nipadayag sa iyang kahinam nga makapahigayon sila og mga duwa sa Sugbo, nga nailang usa ka nindot nga tourist destination.

Ang kampyon sa EASL ma­kadawat og $1 million nga ganti, makaluklok og $500,000 ang 2nd placer ug $250,000 sa 3rd placer.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph