Liog sa babaye gilaslas sa uyab

TAMPO
NABILANGGO: Nabalhog sa bilanggoan ang 58 anyos nga drayber suspek sa paglaslas sa iyang 52 anyos nga uyab gamit ang mahait nga cutter, alas 7 sa gabii, Sabado, Hunyo 8, 2024, sa national highway sa Barangay Lawaan 1, siyudad sa Talisay. / TAMPO

Nag-atubang og kasong frustrated homicide ang usa ka taxi drayber human iyang gilaslasan ang liog sa iyang uyab gamit ang cutter sa national highway sa Barangay Lawaan 1, dakbayan sa Talisay, Sugbo, alas 7 ka gabii, Sabado, Hunyo 8, 2024.

Ang biktima giila nga si Merle Antona Verano, 52, dalaga, samtang ang suspek mao si Alfredo Nacua Alinsug, 58, ulitawo, taxi driver, pulos mga molupyo sa Sityo Caimito, Barangay Guadalupe, dakbayan sa Sugbo.

Sa pakisusi sa Superbalita Cebu sa imbestigasyon sa kapulisan sa Talisay ubos sa kamandoan sa ilang hepe nga si P/Lt. Col. Epream Paguyod, nasayran nga ang biktima ug ang suspek manag-uyab.

Nagsakay og motorsiklo gikan sa siyudad sa Sugbo ug nagpadulong sa siyudad sa Carcar sa habagatan.

Ang suspek maoy nagmaniho sa motorsiklo ug angkas ang biktima.

Apan, sumala sa kapulisan, ang duha nagkalalis samtang nagbiyahe tungod sa giingong pagpangabubo sa lalaki sa ilang silingan.

Ug pag-abot sa Lawaan 1 sa Talisay, nihunong ang suspek ug iyang gilaslas ang liog sa biktima gamit ang cutter hinungdan sa komusyon.

Ang biktima gidali sa pagtabang sa responders sa Tali­say Disaster Risk Reduction and Management Office ug gidala sa Cebu South Medical Center.

Samtang ang suspek nga nagkadugo usab ang kamot nga bitbit ang cutter, ang nadakpan sa mga estambay sa maong dapit ug gi-turn over ngadto sa kapulisan sa Tali­say.

Gipaabot nga pasakaan kini og kaso ning adlawa, Hunyo 9, sa kapulisan sa Talisay. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph