Usa ka 7 anyos nga batang babaye ang napalgang patay sa iyang inahan human nabitik ang liog sa bata sa straw nga higot sa Sityo Canoque, Brgy. Binalbagan, dakbayan sa Canlaon, Negros Oriental, ala 1:30 sa hapon sa miaging Huwebes, Mayo 30, 2024.
Ang biktima mao si Ana (dili tinuod ngan), 7, molupyo sa naasoy nga dapit.
Sa imbestigasyon sa kapulisan sa Canlaon City Police Station ubos sa kamandoan sa ilang hepe nga si P/Lt. Col Sonny Silva, nasayran sa Superbalita Cebu nga subay sa asoy sa inahan nga ang iyang anak nag-inusarang nagduwaduwa sa luyo nga likod sa ilang balay.
Sa iyang pagsusi, iyang nakit-an ang iyang anak nabitik ang liog sa straw nga wa nay panimuot ug gidala sa tambalan apan gideklarar nga dead on arrival sa attending physician nga si Hazel Frans Uy.
Ang kapulisan nihimo og dugang pakisusi sa pagsuta sa matuod nga hinungdan sa kamatayon sa bata. / DVG