Estrikto nga gipatuman sa Police Regional Office sa Negros Island Region (PRONIR) ang liquor ban sugod gahapon, Mayo 11, hangtud karon, Mayo 12, alang sa national ug local elections (NLE).
Si Brigadier General Arnold Thomas Ibay, PRO-NIR officer-in-charge, niingon nga ilang gipatuman ang liquor ban subay sa Commission on Elections (Comelec) Resolution 11057.
Ang liquor ban nagsugod alas 12 sa udto sa Mayo 11 ug matapos sa alas 11:59 sa gabii sa Mayo 12.
Matod ni Ibay, ang liquor ban nagdili sa pagbaligya, pagpalit, ug pag-inom og ilimnong makahubog sa mga pampublikong lugar sa nahisgutang panahon, aron makatabang sa pagsiguro nga malinawon ug hapsay ang piniliay.
“The liquor ban is a critical component of our security preparations for NLE 2025. We call on everyone to cooperate and remain responsible citizens to help ensure credible, safe, and peaceful elections throughout the Negros Island Region,” gidugang ni Ibay.
Siya miingon nga ilang gilauman ang hingpit nga pagsunod gikan sa publiko ug mga establisemento sa negosyo.
Sigon niya nga ang PRO-NIR, uban sa koordinasyon sa local government units ug Commission on Elections (Comelec), mopakatap og monitoring teams ug mohimo og inspeksyon sa mga establisemento aron masiguro nga masunod ang pagdili.
Dugang pa niya nga ang mga malapason mahimong mag-atubang og mga silot ubos sa kasamtangan nga mga balaod sa eleksyon, lakip na ang pagkabilanggo ug mga multa.
Giawhag ni Ibay ang tanang lokal nga residente, turista, ug mga tag-iya og negosyo nga magiyahan ug i-report ang bisan unsang kalapasan o kadudahang kalihokan pinaagi sa pinakaduol nga police station.
Si Lawyer Jossil Macute, Comelec assistant regional director for NIR, niingon nga alang sa kaso sa vote buying, ang reklamo mahimong kuhaan og mga hulagway ug video isip ebidensiya ug i-report sa pinakaduol nga police station o sa Comelec. Matod niya, kinahanglan nga andam ang reklamante sa pagpasaka og affidavit alang sa pagpuno sa kaso batok sa giingong vote buying.
Siya midugang nga di ma-aksyonan sa kapulisan o Comelec ang reklamo nga i-post lang sa social media.
Gitataw ni Macute nga kinahanglang personal kining i-report sa reklamante ngadto sa mga awtoridad aron ila kining maaksyonan dayon.
Sa laing bahin, gipahinumdoman ni Macute ang mga kandidato nga panahon na nga mag-relax sanglit human na ang campaign period. (MAP)