Gipaneguro sa kagamhanan sa Dakbayan sa Sugbo nga magamit ang tanang fire hydrants ug sayon makita panahon nga dunay mahitabong sunog.
Gituki karon ang nagkasumpaki nga datos bahin sa gidaghanon sa mga hydrants tali sa Bureau of Fire Protection (BFP) ug sa Metropolitan Cebu Water District (MCWD), ug aron makuha kadtong nagbabag o nag-okupar sa mga hydrant.
Si Ramil Ayuman, tsirman sa Cebu City Disaster Risk Reduction and Management Council (CCDRRMC), nitataw nga mas maayong ibutang ang mga hydrant sa strategic nga dapit nga kanunay’ng mahitabo ang sunog.
Namatikdan ang dakong kalainan sa rekord sa mga fire hydrant tungod kay ang BFP naglista og 226 samtang ang MCWD dunay 368.
Gikabalak-an pa gyud nga 23 lamang niining mga hydrant ang adunay water meters.
Atol sa tigom sa CCDRRMC niadtong Martes, Hunyo 10, nasabutan nga ang katapusang nahusay nga datos bahin sa fire hydrants isumite sa dili pa moabot ang Hunyo 26.
Matod ni Ayuman nga ang tanang fire hydrants kinahanglang functional ug sayon kining makit-an ug markahan.
Dugang niya nga ang pundo alang niini, tukion pa sa kagamhanan sa siyudad ug sa MCWD.
Niingon si Ayuman nga makompleto ang gihiusa nga datos sa dili pa pormal nga molingkod ang bag-ong administrasyon.
Si Mayor-elect Nestor Archival nipadayag usab sa iyang suporta alang sa pagbutang og water meters sa tanang fire hydrants.
Sa usa ka interbyu sa telepono niadtong Martes, iyang gibutyag ang kamahinungdanon sa pag-monitor sa paggamit sa tubig, tungod kay ang gihatag pinaagi sa mga hydrants alang sa pagpalong sa kalayo giisip nga non-revenue water alang sa MCWD.
“Ang point nako makahibawo ta pila’y tubig makuha. Kinahanglan ta makahibawo pila ang effect sa paggamit sa MCWD,” pasabot ni Archival.
Ang Cebu City Fire Office (CCFO) atol sa tigom sa CCDRRMC nitaho sa kahimtang sa fire hydrant network sa siyudad.
Gikan sa 226 ka fire hydrants, 52 ang hinay ang presyur sa tubig, 42 ang di na magamit, ug 11 ang gibabagan.
Sa mga magamit nga hydrants, 19 ra ang adunay taas nga presyur sa tubig, ug 23 ra ang giisip nga maayo ang kahimtang.
Ang taho sa CCFO nahimo tungod sa daghang mga reklamo gikan sa mga bombero bahin sa di magamit nga mga hydrant panahon sa emerhensya.
Ilang gisugyot nga dalion ang pag-ayo sa nangaguba nga hydrants aron dali ang pagtubag sa mga alarma sa sunog. / JPS