Nabalhog sa custodial facility sa Philippine Drug Enforcement Agency (PDEA) Negros Oriental Police Provincial Office (Noppo) ang usa ka lalaki nga nabutang sa regional target-listed nga drug personality uban sa iyang live in partner human nasikop sa buy-bust sa alas 6:35 sa gabii sa Martes, Pebrero 2024, sa Purok Opao, Barangay Tugas, dakbayan sa Tanjay, Negros Oriental.
Ang mga suspek giila nga sila si Vincent Bryan Mier, 41, ug ang iyang live in nga si Tiffany Camille Ferrer, 35.
Nakuha ang pito ka mga pakete sa gituohang shabu nga motimbang og 16 gramos nga dunay estimated market value nga P108,800.
Lakip sa nakuha ang mga gamit sa pagsuyop sa ilegal nga drugas ug marked money.
Matod ni Leia Alcantara, information officer sa PDEA 7, nga moabot og usa ka buwan ang ilang case build up human madawat ang impormasyon gikan sa kasaligang tinubdan.
Giingong makabaligya ang mga suspek og 100 ngadto sa 200 gramos nga shabu matag semana.