Live wire natandugan, truck boy namatay
Igo lang unta giwaling sa truck boy ang nagbitay nga wires nga nasangit sa trak de karga, apan nakuryentihan kini sa live wire hinungdan nga mikirig ug niresulta sa iyang kamatayon.
Nahitabo kini sa Barangay Lamacan, Lungsod sa Sibonga niadtong Huwebes sa buntag, Agusto 8, 2024.
Ang namatay nailhan nga si Nelvert Alconava, 34, taga Barangay Cansuje, Argao ug truck boy/helper sa Bencolita Enterprises.
Sa pasiunang imbestigasyon sa Sibonga Municipal Police Station nga base sa asoy sa drayber sa trak de karga nga si Orlando Borbon, 51, nga aduna sila'y delivery sa maong lugar ug namatikdan nga adunay kable nga nasangit sa ibabaw nga bahin sa trak hinungdan nga kinahanglan nga iwaling aron dili mabitad.
Si Alconava ang misaka nga nagdala og kable aron nga iyang higtan ang wires nga nagbitaw aron nga mahipos og di mosabod sa tag-as nga sakyanan.
Apan natandog niini ang live wire nga kuryenti hinungdan nga nakuryentihan ug nahug gikan sa trak de karga.
Mga sakop sa Sibonga Municipal Disaster Risk Reduction and Management Office ang mirespondi og mitabang ni Alconava.
Apan gideklarar nga patay na sa dihang nadangat sa tambalanan. / DVG