Ang mga asosasyon sa mga mag-uuma ug mga magpapatigayon sa lungsod sa Alegria ug Dalaguete nakadawat og hinabang sa panginabuhian, lakip na ang mga makinarya, sakyanan, ug mga negosyo sa pamatigayon nga mokabat sa dul-an P20 milyunes gikan sa Department of Agriculture (DA 7).
Ang P18.8 milyunes nga kantidad sa trading facility project gi-turnover sa Lepantohanong Hugpong sa Kalambuan (LEHUK) sa Alegria niadtong Huwebes, Enero 25, 2024.
Sumala sa taho sa DA 7, ang proyekto gipundohan sa Department of Agriculture’s Philippine Rural Development Project (DA-PRDP), nga naglakip sa pagtukod ug turnover sa trading post ug buying station nga adunay storage facility ngadto sa LEHUK isip benepisyaryo,
Ang LEHUK, isip proponent group (PG) sa United Peoples Organization Highland Vegetable Production and Trading Enterprise (UPOHVTE) nga proyekto, maoy modumala ug mo-operate sa maong negosyo.
Ang proyekto nagtumong sa pagpagaan sa kabalaka sa mga mag-uuma sa kabukiran sa Alegria sa pagdala sa mga produkto sa agrikultura gikan sa kabukiran ug mga umahan ngadto sa pasilidad sa pagtipig.
Ang presidente sa LEHUK nga si Juan Medel niingon sa pamahayag niadtong Huwebes nga sa wala pa ang project turnover, mogasto sila og P50 matag sako sa pagdala sa ilang mga produkto sa agrikultura ngadto sa mga wholesale nga merkado sa Nug-as, Alcoy ug sa Mantalongon, Dalaguete.
“Pinaagi sa proyekto, ang atong mga utanon nga produkto mahimo na nga tipigan sa pasilidad, nagpakunhod sa atong gasto sa transportasyon. Ang mga delivery trucks gikan sa pasilidad mao ang usa nga mokuha sa mga produkto ug dad-on kini sa storage facility,” matod pa ni Medel sa post sa usa ka pamahayag gikan sa taho sa DA 7.
Sila si DA 7 Executive Director Angel Enriquez ug Alegria Mayor Gilberto Magallon maoy nangulo sa ceremonial turnover sa maong trading enterprise ngadto sa LEHUK.
Sa pamahayag sa DA 7, si Enriquez niila sa unom ka mga organisasyon nga nalambigit sa proyekto nga mao ang LEHUK, Guadalupe Upland Farmers Asso. (GUFA), Valencia Inghoy FA (VIFA), Compostela FA (COMFA), Mag-uumang Lumolupyo sa Montpeller (MALUMO) ug Sta. Filomena Farmers and Fisherfolk Asso. (SAFFA), aron masiguro ang pagpadayon sa pasilidad sa pamatigayon ug pagtipig.
Ang proyekto adunay kinatibuk-ang kantidad nga P18.8 milyunes, diin ang P11.9 milyunes gikan sa World Bank, P2.8 milyunes gikan sa Nasudnong Kagamhanan, P2.9 milyunes gikan sa Local Government Unit (LGU) sa Alegria, ug ang P3.8 milyunes gikan sa counterpart sa proponent.