Gibanhaw sa kagamhanan sa Probinsya sa Sugbo ang Barangay Animal Health Aide (BAHA) Congress aron pagpalig-on sa papel sa mga representante sa pagpanalipod sa livestock ug poultry industry sa Sugbo.
Ang maong tigom gitambongan sa 800 ka mga BAHA representatives sa IEC Convention Center sa Sugbo sa Agusto 19, 2026.
Kini gipangulohan ni Provincial Veterinary Office (PVO) head Dr. Mary Rose Vincoy nga naghatag sad og mga lectures labot sa livestock ug poultry protection, biosecurity alang sa backyard swine industry, poultry production ug disease management.
Apil sab ang veterinary documents alang sa animal movement ug cattle production and management.
Si Cebu Governor Pamela Baricuatro sa iyang pamahayag nagtinguha sa pagpalambo sa produksyon sa Sugbo sa pagkaon aron masiguro nga secured kini sa tanang panahon bisan paman sa giatubang nga krisis.
“Kabalo man mo nga very close to my heart ang food security. I dream of a Cebu that can produce more of its own food. A Cebu where our farmers and fisherfolk can earn better. A Cebu where agriculture is not seen as a last option, but as a real opportunity for our families and our young people,” matod ni Baricuatro sa Agusto 19, 2026.
Iyang gidugang nga dako og mahimo ang mga BAHA sa pagpanalipod ug pagpalambo sa panginabuhian ilabi na sa disease detection, farmer education, vaccination, disease surveillance, rabies prevention, ug uban pang serbisyo alang sa panglawas sa mga hayupan.
Gawas sa lecture nisaad ang gobernador nga makadawat og tag P10,000 nga cash assistance ang tanang mo-retire nga mga BAHA isip kabahin sa pagpasalamat sa suporta niini sa Probinsya sa Sugbo.
Samtang gipasidunggan sab ang Top 10 Outstanding BAHA Associations.
Nakadawat sab og moabot sa P200,000 nga cash prize ug Agrivet supplies ang giapud-apod sab sa mga partisipante atol sa raffle draw.
Lakip sa mitambong sa maong kalihukan sila si Vice Governor Glenn Soco; board members ug Department of Interior and Local Government (DILG) Provincial Director Jesus Sastrillo. / ANV
