Gisinggit sa mga grupo sa mga mamumuo sa Sugbo sa ilang sa lihok-potesta sa kadalanan atol sa Labor Day, Mayo 1, 2024, mao ang P1,268 nga “living wage.”
Sila nidugang nga ang mga amo adunay kapasidad sa pagsunod niini, base sa bag-o nga resulta sa economic performance sa Central Visayas, nga gi-tag nga “fast-growing” nga ekonomiya sa nasod.
Si Jaime Paglinawan, usa ka labor leader gikan sa Alyansa sa mga Mamumuo sa Sugbo-Kilusang Mayo Uno, nihatag og gibug-aton nga ang gobyerno kinahanglang magseguro sa igong bayad aron mabuhi matag adlaw nga komportable.
LIVING WAGE
Matod ni Paglinawan nga sa pagkutlo sa datos sa non-profit research group nga Ibon Foundation, kinahanglan nga P1,268 ang panginabuhi sa pamilya sa Central Visayas matag adlaw, nga kulang og P800 sa minimum nga suholan sa rehiyon.
Ang living wage maoy kita nga gikinahanglan aron matubag ang mga batakang panginahanglan sama sa pagkaon, balay, pag-atiman sa panglawas, ug uban pa.
Sa Septiyembre 2023, gianunsyo sa Regional Tri-Partite Wage and Productivity Board (RTWPB 7) ang Wage Order ROVII-24, nga nagpatuman sa P33 nga usbaw sa suholan sa pribadong sektor sa Central Visayas, epektibo niadtong Oktubre 1.
Nisaka ang minimum nga inadlaw nga suholan sa Class A areas ngadto sa P468 gikan sa P435; Class B areas, P430 gikan sa P397; ug Class C areas, P420 gikan sa P387.
Ang Class A: mga dakbayan sa Carcar, Cebu, Danao, Lapu-Lapu, Mandaue, Naga, Talisay, ug mga lungsod sa Compostela, Consolacion, Cordova, Liloan, Minglanilla ug San Fernando.
Ang mga siyudad nga wala mahisakop sa Class A nailalom sa Class B ug ang mga lungsod nga wala sa Class A o B gi-categorize nga Class C.
Alang sa agriculture ug non-agriculture establishments nga wala pay 10 ka mga trabahante, ang inadlaw nga minimum nga suholan karon gikan sa P415 ngadto sa P458, depende sa klasipikasyon sa lugar.
Si Paglinawan niingon nga ilang gisuportahan ang P750 nga across-the-board wage recovery increase sa pribadong sektor sa tibuok rehiyon. / KJF