Giklaro sa Kagamhanan sa Probinsiya sa Sugbo nga alang lang sa mga empleyado ang nikatap nga memorandum sa social media nga di paagian ang lobby sa buhatan sa gobernador.
Kini gipatuman aron ma-manage ang foot traffic sa gamay nga agianan sulod sa Kapitolyo samtang nagpadayon pa ang gihimong renovations.
Unang nikatap sa social media ang memorandum nga gilagdaan ni Assistant Administrator Aldwin Empaces nga nagmando nga ang access paingon sa lobby sa gobernador limitado lamang sa adunay mga appointment sa gobernadora.
“With this, employees are encouraged to use alternative routes,” saysay sa memo nga giluwatan niadtong Marso 30, 2026.
Apan matod sa Kapitolyo, tungod kini sa gihimong improvements aron mapaluagan ang lobby alang sa mas dakong lugar nga kadawatan sa mga bisita.
“We also take this opportunity to assure everyone that the Cebu Provincial Capitol remains open to the people,” saysay sa pamahayag niini.
Gihimug-atan sa kagamhanan nga giingong gawas sa mga agianan, nagpabilin sab nga bukas ang Kapitolyo alang sa pagpagamit sa publiko dili lang sa mga meeting, lakip na sa kasal, ug uban pa’ng selebrasyon.
Matod sa Kapitolyo nga dugay nang giplano ang renovation sa maong area.
Gipasalig niini nga kon mahuman na ang gihimong pag-ayo, mahimo na kining magamit sa publiko.
“Once completed, the passage hall will be transformed into a People’s Lobby gallery, where the visitors can sit, wait, and admire the Capitol’s iconic architecture,” dugang niini. /