Nalandig sa tambalanan ang usa ka 83 anyos nga lola nga naglingkod ra unta sa nag-parking nga e-bike human kini gibanggaan og usa ka laing e-bike nga gisakyan og siyam ka mga batan-on nga gituohang mga nakainom mga alas 5:00 sa buntag Sabado, Hunyo 21 sa dan B. Aranas, Barangay San Nicolas Proper ning Siyudad sa Sugbo.
Ang biktima nga nakaangkon og dakong bukol sa agtang ug mga samad sa bukton ug paa naila nga si Fileza Villanezo, byuda, ug nagpuyo ra sa maong dapit.
Si Lola Fileza, mibutyag nga naglingkod siya sa iyang e-bike sanglit namainit siya niadtong higayuna ug kalit lang nibangga ang usa ka e-bike nga puno sa mga batan-on diin grabi nalang iyang kakuyaw kay matod pa kalit kaayo ang panghitabo.
Tungod usab sa kakusog sa pagbangga, hapit usab natuwad ang e-bike ni lola ug miresulta sa pagkaguba niini.
Misaysay sab si alyas “Marie” apo sa biktima, nga ang nagdrayb sa e-bike nga nibangga, usa ka babaye.
Human sa pagkabangga, nag-iyahay og naog ang pipila sa mga batan-on sa maong e-bike ug dali kining misibat nga mura rag walay nahitabo.
Samtang ang tinuod nga drayber sa e-bike ug ang menor nga higala niini mao lamang ang nagpabilin sa dapit.
Sa dugang pakisusi, ang mga batan-on gituohang gikan nag-inom sanglit dunay nakasaksi nga wala pa kini nahuwasan sa kahubog.
Makita usab sa CCTV footage sa lugar nga dihang wala pa nabangga ang mga batan-on, wala na nagkadimaog dagan nga e-bike nga susama sab nga hubog.
May nalang gani nakuha dayun nila ang yawi sa e-bike hinungdan nga wa kini makaikyas ug gidala kini sa barangay hall.
Sa pagkutlo ning balita, wala pa nakagawas ang biktima sa tambalanan tungod sa naangkon niyang mga samad ug matod sa mga apo niini nga ipaubos nila sa CT scan ang ulo sa ilang lola sanglit nagtuo sila nga naigo kini sa puthaw sa e-bike.
Andam usab sila mopasaka og reklamo batok sa mga responsable sa maong insidente.
Gitanggong karon ang e-bike sa barangay hall sa San Nicolas Proper samtang padayon gihapon ang pagsusi sa mga otoridad sa mga nalambigit nga batan-on sa maong panagbangga. / JDG