Usa ka lola ug laing lima ka “ushers” sa illegal numbers swertres games nangadakpan sa managlahing mga operasyon sa kapulisan sa Probinsya sa Sugbo.
Napusasan kining usa ka lola human naaktuhan sa kapulisan nga nag-isyu og number combinations alas 12:30 sa udto niadtong Marso 25, 2025 sa Sitio Bocung Barangay Buenavista, Dakbayan sa Carcar.
Si Alberta Satuita Maning, 62 anyos, minyo nga nagpuyo sa nahisgutang lugar, napusasan sa personnel sa Carcar City Police Station nga nagpahigayon sa anti-illegal gambling operation sa dapit.
Naaktuhan sa kapulisan nga nag-isyu sa maong sugal si Maning nga walay permit gikan sa gobiyerno gamit ang unauthorized paraphernalia.
Nakunpiskar sa posisyon niini ang usa ka intermediate paper strip nga dunay tulo ka nagkadaiyang number combinations, usa ka ballpen, P90 nga halin ingon man bust money nga P20.
Gisunod sa kapulisan pagsikop ang kaliwat ni Maning nga si Jocelyn Pabroa Satuita, 33, minyo, sa alas 12:40 sa samang adlaw sa Proper Barangay Valencia, Carcar City.
Nakunpiskar sa posisyon ni Satuita, ang usa ka bundle stub nga adunay daghang gisuwat nga numbers alang sa illegal numbers swertres games nga dunay schedule sa bola niini, lakip na ang pusta sa sugal ug ubang gambling paraphernalia.
Napusasan sab sa kapulisan si Froilan Lopez Enjada, 28 anyos, ulitawo, taga Sitio Tinaan, Barangay Valencia, Carcar City.
Ubay-ubay sa gambling paraphernalia ug pusta sa illegal nga sugal nakunpiskar sa kapulisan gikan kaniya.
Napusasan sab sa kapulisan sa alas 3:00 sa hapon sa mao gihapon nga adlaw ang laing babaye nga si Cadrina Anzano Tangaro, 44, minyo, sa Sitio Lunas, Barangay Calidngan, Dakbayan sa Carcar.
Samtang wala sab kaipsot sa kapulisan si Maricres Geoca Dequillo, 37, minyo, taga Barangay Landing DAS, Dakbayan sa Toledo human naaktuhan sa kapulisan nga nag-isyu sa illegal numbers game.
Nakuha sa iyang posisyon ang mga gambling paraphernalia ug pusta sa illegal nga sugal.
Sunod nga napusasan mao si Merie Ann Aradan Abad, 30, minyo, taga Barangay Poog, Dakbayan sa Toledo, dihang naaktuhan sa kapulisan sa Barangay DAS.
Ang mga gipangdakop napasakaan na og kasong kalapasan sa RA 9287.
Ang kapulisan sa Probinsya sa Sugbo walay hunong sa ilang Anti gambling operation batok niadtong mga nalambigit sa illegal nga sugal. /GPL