Napalgan nga wala nay kinabuhi ang usa ka 84-anyos nga lola human maanod sa baha atol sa pagbunok sa kusog nga uwan nianang ala 1 sa hapon sa Sitio Cambaga, Barangay Ginabucan bukirang dapit sa Lungsod sa Catmon, Probinsiya sa Sugbo alas 11:00 sa gabii, Lunes, Hunyo 16, 2025.
Ang biktima giila nga si Gregoria Colita Podot, 84, nga residente ra sab sa maong lugar.
Sa imbestigasyon sa Catmon Police Station base sa pamahayag ni Jostino dela Cerna, 62, taga Sitio Centro, Barangay Ginabucan sa Catmon nasayran nga samtang nipahuway siya tungod sa pagbunok sa kusog nga uwan, iyang nakita ang lawas sa tawo nga naanod sa baha.
Dali niya kini nga gidagan ug nisangpit og panabang sa mga tawo sa dapit nga mao na sab ang nanawag sa mga personnel sa Municipal Disaster Risk Reduction and Management Office (MDRRMO) nga nihimo sa retrieval operation.
Nilanat og pila ka oras ang gihimong retrieval operation ug pagka alas 11:00 na sa gabii nakit-an ang patay nga lawas nga nasangit sa mga sagbot.
Matod ni Police Captain Renerio Mejias ang hepe sa Catmon Police Station nga nianang udto ang biktima nilugsong aron mokuha sa iyang apo nga nag-eskwela.
Atol nga nibunok ang kusog nga uwan ug nisaka na ang tubig sa sapa, gituohan sa kapulisan nga nipugos ang biktima sa paglabang nga maoy hinungdan nga nabanlas.
"Naa man gud nay sapa diha, kana daw si lola niadto na sa eskwelahan kay giapas ang apo 'nya pag-uli kusog-kusog na ang uwan unya taas nasad ang tubig sa sapa mao to naanod," matod ni Mejias.
Niana nang hapon gi-report sa kabanay ngadto sa kapulisan nga dunay naanod sa baha nga tungod ani gilusad dayon ang search and retrieval operation sa MDRRMO sa Catmon ug pagka alas 11 sa gabii hingpit ni nga napalgan. / AYB / GPL