Nadakpan na usab sa kapulisan sa ikaunom nga higayon ang usa ka drug runner nga lola human nagtinir og pipila ka pakete sa gituohang shabu alas 10 pasado sa kabuntagon, Hulyo 17, 2025 sa may Barangay Tejero sa syudad sa Sugbo.
Ang maong dinakpan mao si alyas Lita, 64 anyos, nagpuyo sa Barangay Ermita, dakbayan sa Sugbo.
Nasikop si Lita sa mga sakop sa Drug Enforcement Unit sa Waterfront Police Station sa Cebu City Police Office atol sa gipahigayon nga buy-bust operation.
Nakuha gikan sa iyang posisyon ang ilegal nga drugas nga motimbang og 0.15 gramos og mobalor og P1,020.
Si Lita nitug-an nga nahimo niya ang ilegal nga kalihukan tungod kay nangiyawat siya nga makakwarta para sa ilang kunsomo matag adlaw tungod kay siya na lang ang nagbuhi sa iyahang mga apo sanglit wala na siyay bana.
Matud pa nga ang dinakpan maoy suguon sa pagpapalit og ilegal nga drugas bugti sa suhol nga P50 sa tulo ka gagmay’ng pakete.
Kasong kalapasan sa Section 11 Article 2, Republic Act 9165 kon Comprehensive Dangerous Drugs Act of 2002 ang atubangon sa maong suspek. / JDG