Diha na naabtan sa sawog ang 70 anyos si Esperanza Muñoz Formentera nga wala nay kinabuhi sulod sa iyang gipuy-an sa Purok Tuyokon, Barangay Tabionan, bukirang bahin sa Lungsod sa San Fernando.
Si Formentera napalgan sa alas 4:00 sa hapon, Martes, Pebrero 18, 2025.
Basi sa imbestigasyon ni Police Corporal Hetbert Lapitan sa San Fernando Municipal Police, nasayran nga nag-inusara sa maong balay si Formentera niadtong higayona kay ang iyang bana nipauli sa Isla sa Camotes kay adunay giatiman.
Sigon sa mga nakaila nga si Formentera adunay higayon nga sul-an sa iyang kabuhi o nervous breakdown nga moingon adunay gustong mopatay kaniya.
Katapusan siyang nakit-an nga buhi nianang Pebrero 17 sa hapon ug wala na mogawas sa balay nianang buntag sa Pebrero 18 diin naandan nga maglawog siya sa iyang binuhing manok ug magsag-ob og tubig.
Usa sa mga suod nga silingan nisusi ni Formentera ug napalgan nga wala nay kinahabuhi diha sa sawog nga adunay higot sa iyang liog.
Samtang adunay nabugto nga kutay sa pisi nga gihigot sa kisame.
Gisusi pa kon adunay foul play sa kamatayon sa maong tiguwang.
Sa kadtong nag-antos og depression ang Philippine Mental Health Association, Inc. Cebu Chapter nagtanyag og online psychiatric ug psychological services.
Mamahimong matawgan ang mga mental health professionals sa mobile number nga 0917-655-0023; pmhacebu1950@gmail.com, Lunes ngadto sa Biyernes, 8AM-5PM.
Mamahimo sab nga tawgan ang Tawag Paglaum Centro Bisaya, 24/7 call-based hotline alang sa suicide prevention ug emotional crisis sa numero 0939-937-5433; 0939-936-5433 ug 0927-654-1629. / DVG