Patay na nga napalgan sa sulod sa usa ka septic tank sa subdivision sa Barangay Tungkil, Lungsod sa Minglanilla ang usa ka 77-anyos nga lola nga unang gipangita ug gipanawagan sa social media human mawala niadtong Lunes, Agusto 3, 2026.
Giila sa iyang pamilya ang biktima nga si Glenda Petallana Angel, 77, nga nagpuyo sa maong barangay.
Usa ka residente sa subdivision ang nakabantay nga nahagbong ang tabon sa septic tank ug sa iyang pagsusi, nakurat na lang siya nga nakit-an ang lawas sa usa ka babaye nga naglutaw-lutaw ug wala na’y kinabuhi. Dali kining nangayo og tabang sa mga silingan nga nipahibalo sab sa Minglanilla Municipal Police Station.
Subay sa imbestigasyon sa kapulisan pinangulohan ni Police Lieutenant Colonel Maria Theresa Macatangay, giila dayon sa mga anak ang patayng lawas sa biktima.
Nasayran nga adunay Alzheimer’s disease ang biktima ug katapusang nakit-an nga nagbaktas sa Barangay Tungkil alas 4:00 sa kaadlawon niadtong Lunes human nigawas sa ilang balay samtang nangatulog pa ang iyang pamilya.
“The night daw kanang Dominggo padung Lunes nangatulog ni sila sa ilang panimalay and ang tigulang diri natulog sa ubos 'nya ang gabantay that time ang iyang family relative. Ang iyang apo didto natulog sa taas, pagmata pagkabuntag wala na diha ang apohan. Gipangita nila ug gidangop pa nila sa other news outfits ug ni-report sab sila sa police station,” matod ni Macatangay.
Matod sa pipila ka residente sa subdivision, niadtong Lunes sa kaadlawon nakadungog sila og sige'g paghot sa iro ug naglagubo sa dapit, apan sa ilang pagsusi wala sila'y nakit-ang tawo ug wala magdahom nga ang biktima na diay sa maong lugar.
Wala'y nakitang foul play ang mga imbestigador ug nagtuo nga posibleng naligas ang tiil sa biktima ug nahulog sa septic tank.
Gisusi gihapon ang mga CCTV samtang gipaabot ang resulta sa autopsy gikan sa Scene of the Crime Operatives (Soco). / AYB
