Namatay ang usa ka 79 anyos nga lola sa pagkasunog sa iyang balay samtang iyang duha ka mga apo nangapaso sa alas 11:40 sa buntag, Abril 20,2024 sa Purok Bulahan, Sityo Media, Brgy. Poblacion, Argao, habagatang Sugbo.
Kini ang nasayran sa Superbalita Cebu sa interbyo kang Roel Espina, 42, ulitawo apan may kapuyo, anak sa biktima’ng namatay nga si Carmelita Montejo,biyuda.
Samtang ang mga anak nga sila si Micayla, 19, ug Roel Abraham, 5, nakabaton og mga paso sa ilang kamot ug tiil, nalandig sa Bogo Argao District Hospital.
Matod ni Espina nga didto siya sa bus stop sa national highway sa Brgy. Poblacion kay namasahero gamit ang iyang tricycle.
Ang iyang kapuyo nibiyahe sa Siyudad sa Sugbo busa ang iyang inahan ug duha ka mga anak mao lang ang nangahabilin.
Sa wa pa ang sunog, dunay nadungog nga buto sa kwarto sa ikaduhang andana sa ilang balay.
Siya nagtuo nga linya sa kuryente ang nibuto ug maoy sinugdanan sa kayo.
Si Espina nagkanayon nga niuli siya ug diha na ang kabumberohan sanglit duol ra ang fire station.
Apan wa na matabang pa ang kadako sa kayo labina kay ang usa nila ka fire truck nadaut.
Ang mga tawo nga nagpakabana kuyog sa ilang barangay kapitan nga si Dario Canada ug ang mga sakop sa municipal disaster team ningtabang og kawos og tubig aron ibubo sa nasunog.
Ang duha ka mga anak ni Espina nakagawas sa ilang balay apan nangapaso samtang ang iyang inahan nga nakagawas na unta nibalik sa sulod sa wa nila masayri nga hinungdan.
Paig na kining nakaplagan human naugdaw sa kayo ang balay.
Sa pasuwat ning taho wa pay opisyal nga report ang kabumberohan kay nitubag og alarma sa grass fire.