Malampusong nangasikop ang usa ka senior citizen nga babaye, bana nga gibuwagan sa asawa, ug usa ka sikad drayber tungod sa kalambigitan sa ilegal nga drugas sa managlahing buy-bust buntag sa HulÂyo 15, 2025, sa Barangay Tejero, Dakbayan sa Sugbo.
Base sa imbestigasyon sa Waterfront Police Station, kasikbit lang nga mga sitio nangadakpan ang mga durugista hinungdan nga dali ra nilang nangasikop.
Si alyas Lola Lita, 66-anyos, minyo, usa ka tindera, lumad nga taga Probinsiya sa Bohol apan kasamtangang nagpuyo sa Barangay San Roque, Cebu City ang nakuhaan og duha ka gamay nga pakete sa gituohang shabu.
Ang maong lola suguon lang papalit og shabu bugti sa P20 kada pakete ug niadtong higayona duha ka putos ang gisugo kaniya og gisuholan siya og P40.
Nasayran sab nga nangiyawat si lola para ipalit sa iyang maintenance nga tambal.
Sa kasikbit nga sitio sa nahisgutang barangay, wala sab kaipsot si alyas Jerry, 38, nagpuyo sa maong lugar.
Si Jerry usa ka porter sa pantalan ang naaktuhan nga naghupot og gituohang ilegal nga drugas ug nakuhaan siya og tulo ka gamay nga pakete.
Samtang sa pikas bahin, wala na kasikad sa gimaneho nga traysikad si alyas Romeo human nadakpan sa paghupot og shabu.
Si Romeo, 57, taga Barangay San Roque ang nakuhaan og duha ka pakete sa gituohang shabu.
Gibalhog na ang mga dinakpan sa Waterfront Police Station samtang gipaabot nga mag-atubang sila og kasong dunay kalambigitan sa ilegal nga drugas. / JDG