Patay nang nadangat sa Bogo, Argao District Hospital sa lungsod sa Argao, ang usa ka 82 anyos nga lolo sa dihang gidunggab sa iyang 37 anyos nga apo nga gihulagway sa kapulisan nga magsuolsuol ang deperensya sa pangutok.
Nahitabo kini sud sa balay sa biktima sa Sityo Alang-alang, Brgy. Bogo, lungsod sa Argao, alas 3:40 sa kaadlawon, Dominggo, Abril 14, 2024.
Ang biktima giila nga si Sancho Mier Lovitos ug ang suspek nga apo mao si Wildren Fajardo Lovitos, ulitawo. Ang duha pulos mga molupyo sa dapit.
Ang suspek gikataho nga niangkon sa kapulisan nga sa wa pa ang maong pagpanunggab sa iyang lolo, gipagamit siya’g shabu sa iyang amigo.
Sa dugang pakisusi sa Superbalita Cebu sa Argao Municipal Police Station nasayran nga sa dihang nakadawat sila sa tawag sa mga barangay tanod sa Brgy. Bogo bahin sa alarma sa pagpanunggab ug dali kini nilang girespondihan ubos sa kamandoan sa ilang hepe nga si P/Maj. Ivy Martin Bartolome.
Matod pa, ang biktima natulog sa iyang balay nga gisulod sa suspek ug gidunggab.
Si Walter Lovitos, uyoan sa suspek ug anak sa biktima, nakadungog sa singgit sa iyang papa nga nangayo og tabang ug sa pagsusi niya, nakit-an ang suspek nga nagbitbit og duha ka kutsilyo nga daling nisibat sa maong dapit.
Ang biktima gidali sa pagtabang ug gidala sa ospital apan gideklarar nga patay.
Samtang, ang suspek nadakpan ni Bogo Brgy. Konsehal Edgar Lovitos Famat ug sa mga barangay tanod, alas 6:00 sa buntag sa samang adlaw sa Sityo Ticoy, Brgy. Bogo, Argao.
Sa paghinabi sa Superbalita Cebu ngadto ni Famat, kini nagkanayon nga ang suspek nag-antos sa nervous breakdown gumikan sa iyang bisyo sa inom ug paggamit sa gidiling drugas.
Matod ni Famat nga sa iyang pagpangutana sa maong suspek sa dihang nadakpan kini, nitug-an ang suspek nga sa wa pa nahitabo ang maong krimen, gipaapil siya og hingos og shabu sa iyang amigo.
Ang suspek nialegar nga iyang gipatay ang iyang lolo kay siyay giunhan og dunggab niini.
Apan si Famat nagkanayon nga imposible ang alegasyon sa suspek nga ang lolo niini maoy nanguna og dunggab kay ang biktima halap na ang pananhaw unya bungol usab kini.
Matod ni Famat, ang suspek Ilang gi-turn over sa kapulisan sa Argao ug pasakaan kini og kasong parricide. / DVG