Cebu-City-map
Cebu-City-map

Lolo, lola nagkuptanay, napalgan nga patay na

Gipaabot sa Labangon Police Station ang resulta sa autopsy sa mga patay’ng lawas sa magtiayong se­nior citizens nga napalgang patay sulod sa ilang balay sa Rosalina Village, Barangay Labangon, dakbayan sa Sugbo, alas 4 sa hapon, Lunes, Hunyo 3, 2024.

Ang bana nagpangidaron na og 95 ug ang asawa 85 anyos, nagkupot sa ilang mga kamot sa kama sulod sa ilang lawak.

Ang kapulisan way nakitang timailhan sa foul play sa ilang kamatayon apan nipadayag og katingala sa dungan nga pagkamatay sa duha.

Matod sa usa ka pag-umang­kon sa magtiayon nga mao usab ang nanag-iya sa balay nga gipuy-an sa duha nga padu’ng siya nga moduaw sa duha apan natingala siya nga way nisugat niya ug nanimaho na usab ang sulod sa balay.

Gawas sa kabaho nga nialis­ngaw gikan sa kuwarto sa magtiayon, nanglupad usab ang daghang mga langaw.

Dali siya nga nanawag og polis aron masusi ang sulod sa balay ug sa paglili pa sa bintana sa kwarto sa polis gikan sa Labangon Police Station, nakita niini ang duha nga naghigda nga wala na maglihok.

Matod ni Police Major Eraño Regidor, hepe sa Labangon Police Station, sigon sa paghiling sa tibuok balay sa mga biktima, wala silay nakita nga timailhan nga dunay tawo nga naghimo sa krimen.

Naka-lock usab ang mga pultahan sa atubangan ug sa luyo nga nagpasabot nga walay laing tawo nga nakasulod.

Bisan pa niini, gipaubos gyud sa autopsy ang mga lawas sa magtiayon aron masayran unsay hinungdan sa ilang kamatayon. / AYB

SunStar Publishing Inc.
www.sunstar.com.ph