Namatay ang usa ka 74 anyos nga lolo human siya nadasmagan sa usa ka Suzuki multicab pick-up samtang naglakaw sa kilid sa karsada sa Purok 6, Barangay Cambinocot, bukirang dapit sa Dakbayan sa Sugbo sa alas 8:15 sa gabii, Dominggo, Abril 27, 2025.
Ang biktima giila nga si Hilario Limotan, nagpuyo sa maong lugar, samtang ang nakabangga kaniya mao si Benjie Maunes Ardita, 41, taga Sitio Kang-atis, Barangay Lusaran, Dakbayan sa Sugbo.
Base sa imbestigasyon sa Traffic Enforcement Unit (TEU) sa Cebu City Police Office, naglakaw ang biktima kilid sa karsada dihang naigo sa kusog nga nagdagan nga multicab nga paingon sa Lusaran.
Tungod sa kakusog sa impact, nalagpot ang biktima ug nahagba sa sementado nga karsada nga maoy hinungdan nga nakaangkon kini og dakong kadaot sa lawas.
Dali nga niresponde ang barangay ambulance ug gihatagan og first aid ang biktima apan gideklara kini nga patay na tungod kay wala na mopitik ang pulso niini ug wala na usab magginhawa.
Kasamtangan nga gikustodiya sa TEU ang driver nga nakabangga ug giandam na ang kasong reckless imprudence resulting in homicide batok kaniya. / AYB