Lolo nagpatuli sa Lapu-Lapu

Lolo nagpatuli sa Lapu-Lapu
NAGPATULI: Daghan ang nagpatuli sa Operasyon Libreng Tuli Program sa kagamhanan sa dakbayan sa Lapu-Lapu nga gipahigayon sa Hoopsdome, Barangay Gun-ob, dakbayan sa Lapu-Lapu niadtong Hunyo 14, 21 ug 28, 2024 nga programa sa health office sa dakbayan sa pagtabang sa mga bata nga matuli ning panahon sa bakasyon sa klase. ./ Gikan sa Lapu-Lapu City PIO

Moabot ngadto sa kinatibuk-ang 4,801 ka mga lalaki ang nakapahimulos sa ‘Operasyon Libreng Tuli’ sa kagamhanan sa dakbayan sa Lapu-Lapu.

Hingpit natapos ang ma­ong kalihokan nga gihimo sa tibuok buwan sa Hunyo nga gisugdan didto sa isla sa Olango niadtong Hunyo 7.

Samtang niadtong Hunyo 14, 21 ug 28, maoy schedule sa mainland Lapu-Lapu nga gipahigayon sa Hoopsdome, Barangay Gun-ob, Lapu-Lapu City.

Adunay lima ka mga hamtong na og pangidaron nga mga lalaki ang nagpatuli.

HAMTONG NA

Ang labing edaran mao ang 63 anyos nga lolo samtang ang uban nag-edad og 27, 28, 28 ug 57 anyos.

Ang maong senior citizen nga gitago lang sa pangala’ng Tatay, adunay unom ka mga anak, ug tulo na ka mga apo.

“Nagpuyo ko sa una sa Sogod, Cebu. Karon lang ko nagpatuli kay naa man gud storya storya didto sa una nga sakit daw kay dukdukon (which is kinaraan na pagtuli). Ug i­­ngon si Mayor nga ang iyang gusto nga walay apo si Lapu-Lapu nga pisot,” pamahayag ni Tatay.

Ang administrasyon ni Lapu-Lapu City Mayor Junard Chan inabagan sa buhatan ni Kongresista Cindi King-Chan, nipasiugda sa ‘Operasyon Libreng Tuli’ usa sa mga ti­nguha sa kagamhanan nga makatunol og libre nga me­dical access ngadto sa kaba­taan.

Ang maong kampanya gawas sa libre nga patuli, ang kabataan nakadawat og libre nga medication, ice cream, lugaw, ug burger.

Nagmalampuson ang kalihokan pinaag sa paningkamot sa Department of Health (DOH) 7, City Health Office, Association of Barangay Captain (ABC) President Jasmine Marie Chan ug ang mga sakop sa konseho, barangays, Sangguniang Kabataan. / FVQ, Lapu-Lapu City PIO

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph