Ang low pressure area (LPA) nga gibantayan sa silangang bahin sa Aurora sulod sa Philippine Area of Responsibility (PAR), nahimo nang tropical depression.
Ang Philippine Atmospheric, Geophysical and Astronomical Services Administration (Pagasa) niingon nga pagka-alas 2 sa hapon niadtong Martes, Hulyo 22, 2025, ang tropical depression “Dante” nahimutang sa 1,120 ka kilometro (km) sidlakan sa amihanang Luzon nga adunay labing taas nga gikusgon sa hangin nga 45 kilometros matag oras (km/h) ug pagbuswak sa 55km/h.
Si Dante naglihok paingon sa amihanan-kasadpan sa 20 km/h.
Matod sa Pagasa nga ang mga tropical cyclone bulletin bahin kang Dante ipagawas sugod sa alas 5 sa hapon sa Martes, Hulyo 22.
Ang tibuok Luzon kasamtangang gibunalan sa kusog nga pag-ulan nga dala sa habagat, o habagatang-kasadpang monsoon.
Samtang, gideklarar sa Malacañang ang suspensyon sa klase ug trabaho sa mga buhatan sa gobiyerno sa 30 ka probinsiya sa Luzon ug Visayas karong Miyerkules, Hulyo 23, 2025, tungod sa padayong pagbunal sa habagat (southwest monsoon).
Si Executive Secretary Lucas Bersamin niluwat sa Memorandum Circular 90 alang sa suspensyon sa klase sa tanang lebel sa publiko ug pribadong eskwelahan ug trabaho sa mga buhatan sa gobiyerno sa mga mosunod nga lugar: Metro Manila, Pangasinan, Zambales, Tarlac, Bataan, Pampanga, Bulacan, Cavite, Batangas, Rizal, Occidental Mindoro, Ilocos Norte, Ilocos Sur, La Union, Quezon, Oriental Mindoro, Marinduque, Romblon, Masbate, Sorsogon, Albay, Camarines Sur, Catanduanes, Palawan, Antique, Aklan, Capiz, Iloilo, Guimaras, Abra, Mountain Province, Ifugao, Benguet, Nueva Vizcaya, Nueva Ecija, Laguna, ug Negros Occidental.
Si Presidente Ferdinand Marcos Jr. nimando na sab sa tanang ahensiya sa gobiyerno nga tutokan ang tanang paningkamot sa pagsiguro sa kaluwasan sa matag Pilipino nga nakigbatok sa grabeng baha tungod sa epekto sa habagat.
Ang Department of Social Welfare and Development sa sayo pa niingon nga kapin sa 500,000 ka pamilya sa tibuok nasod ang naapektuhan sa epekto sa habagat nga maoy hinungdan sa grabeng baha sa nagkalainlaing komunidad. /TPM/SunStar Philippines