Kining nasinati nga pagsige og uwan sa Kabisay-an ug Mindanao resulta sa low-pressure area (LPA) suma sa Philippine Atmospheric, Geophysical and Astronomical Services Administration (Pagasa) niadtong Sabado, Mayo 3, 2025.
Si Pagasa Visayas weather specialist Manny John Agbay nagkanayon nga ang LPA posibling mawa na inig Lunes, May 5 apan ang Sugbo ug ubang bahin sa nasod makasinati gihapon og uwan-uwan.
“Tomorrow possibly it will be in Palawan and the province will be affected, so, expect that by Monday this LPA will be dissolved,” matod ni Agbay.
Nidugang si Agbay nga ang Sugbo ug ubang bahin sa Central Visayas makasinati og nindot nga panahon karong adlawa, Domingo sanglit ang low-pressure area (LPA) inanay nga mawa og moirog paingon sa Palawan.
Ang Sugbo makasinati og nindot nga panahon sa sunod semana uban sa grabe nga kainit.
Sa forecast sa Pagasa, sa alas 2:00 kagahapon sa hapon, ang LPA gipaabot nga mahimong Tropical Depression sa mosunod nga 24 oras.
Ang Pagasa nidiklarar sa pagsugod sa dry season niadtong Marso 26, 2025.
Niadtong Huwebes, Mayo 1, ang Pagasa nitaho nga dunay nakasud nga low-pressure area (LPA) sa Philippine Area of Responsibility (PAR) nga nahimutang 515 kilometros sa east sa Hinatuan, Surigao del Sur.
Ang LPA ug ang Intertropical Convergence Zone (ITCZ) magdala og mapanganuron nga kalangitan uban sa pat-ak pat-ak nga pag-uwan ug dunay pagpanugdog ug kilat sa ubang bahin sa Kabisay-an , Mindanao ug Palawan. / CDF