Nagsugod na ang Land Transportation Office (LTO) 7 sa pag-deploy sa ilang mga kawani sa mga terminal ug pantalan sa Central Visayas timaan sa pagsugod sa “Oplan Biyaheng Ayos: Semana Santa ug Summer Vacation 2025.”
Si LTO 7 Regional Director Glen G. Galario niingon nga ang ilang pag-deploy nagsugod niadtong Abril 11, ug magpadayon hangtod sa Dominggo sa Pagkabanhaw sa Abril 20, 2025.
“Ang atong mga kawani makita na karon sa mga dagkong public terminal ug pantalan sa rehiyon aron susihon ang kahapsay sa atong mga pampublikong sakyanan ingon man aron masiguro nga ang mga pasahero makaabot sa ilang destinasyon nga luwas,” matod ni Galario.
Ang mga dagkong terminal ug pantalan sa mga Probinsya sa Sugbo, Bohol, Siquijor, ug Negros Oriental mao ang prayoridad sa LTO 7, ilabi na kadtong adunay daghang pasahero.
Niingon si Galario nga himuon ang visual inspection sa tanang PUV sa dili pa sila makabiyahe sa ilang naandan nga ruta.
“Ang mga dili makapasar hatagan gihapon og panahon aron maayo ang mga kinahanglan nga maayo aron masiguro nga ang ilang mga sakyanan angay nga magdala sa mga pasahero, ilabi na niining panahona nga daghan ang mga pasahero o ang mga nagbiyahe moadto sa bakasyon o mopauli,” dugang ni Galario.
Gawas sa mga inspeksyon sa sulod sa mga terminal ug pantalan, himuon usab ang random nga joint roadside inspections sa panahon sa operasyon.
Gidugang sa Regional Director nga naghimo sila og bag-ong mga lagda sa inspeksyon sa mga bus nga gipatuman na sa ilang mga kawani.
Matod ni Galario nga gawas sa kahapsay susihon usab nila kung adunay balido nga rehistro, lisensya, ug prangkisa ang mga sakyanan.
“Daghan ni sila karon, mao nga ato sab ni silang gipangbatayan kay mahulog ni sila nga nag-breach sa ilang franchise, Naa puy kolurom. Atua ning dakpon ug pahamtangan igong silot o I-impound ilahang sakyanan, “ dugang ni Galario.
Mahimo usab nga moduol ang publiko sa bisan kinsang kawani sa LTO 7 sa mga terminal o pantalan aron ireklamo ang bisan unsang ilegal nga buhat nga mahimo’g himuon sa mga drayber sa PUV.
Para sa mga reklamo, kontaka ang LTO 7 hotline sa 09624460435. / PR