GIPAHIBALO sa Land Transportation Office (LTO) 7 nga sugdan na nila ang pagpanakop sa mga motorsiklo ug sakyanan nga walay permanente o awtorisado nga plaka.
Matod ni LTO 7 Regional Director Glen Galario, ang ilang mga enforcement team ug deputized agents mopahigayon og operasyon. Target nila ang mga sakyanan nga way plaka, dunay improvised, giusab, o dili awtorisado nga plaka, ingon man kadtong naggamit pa gihapon og conduction stickers o MV file numbers bisan og aduna nay opisyal nga plaka.
Kini nga kamanduan gikan ni LTO Chief Assistant Secretary Atty. Vigor Mendoza II ug mahimong epektibo duha ka bulan human sa pag-isyu niini niadtong Hunyo 16, 2025.
Gihangyo ang mga tag-iya sa sakyanan sa Central Visayas nga kuhaon na ang ilang mga plaka sa labing daling panahon.
Mahimo nilang susihon ang status sa ilang plaka sa https://ltotracker.com o mangutana sa ilang dealer. Alang sa mga dunay improvised plates, o kadtong dili sigurado sa status sa ilang plaka, sama sa karaan nga berdeng plaka o second-hand vehicles, kinahanglan mobisita sila sa LTO office diin gi-apply ug gibayran ang plaka.
Ang mga bag-ong rehistrado nga sakyanan nga walay plaka kinahanglan mokonsulta sa LTO 7 New Registration Unit (NRU) sa MVIC Subangdaku, Mandaue City, o sa LTO District Office sa Robinsons Galleria Cebu. / PR