Gitambagan sa Land Transportation Office sa Central Visayas (LTO) 7 ang mga pasahero nga dili mosakay sa mga “colorum” o illegal public transport vehicles taliwala sa pagdagsa sa daghang mobiyahe pauli ngadto sa ilang kalungsoran o mamakasyon atol sa Semana Santa.
Usa ka joint inspection ang gipahigayon sa Land Transportation Franchising and Regulatory Board (LTFRB) 7, Police Regional Office (PRO) 7, Philippine Drug Enforcement Agency sa Central Visayas (PDEA) 7, ug Highway Patrol Group (HPG) sa Cebu South Bus Terminal ug Cebu North Bus Terminal sa Martes, Abril 15, 2025.
Ang mga drayber ug mga konduktor sa public utility vehicles (PUVs) ang gipaubos sa drug testing sa labing dako nga transportation hubs sa Cebu City.
Ang joint inspection gitumong aron masiguro ang kahusay, kalinaw, ug kaluwasan sa mga terminal ug pantalan. Kabahin kini sa Oplan Harabas ilawom sa “Oplan Byaheng Ayos: Semana Santa 2025.”
Si LTO 7 Director Glenn Galario nagkanayon nga ang mga kolorum nga sakyanan naghatag og kakuyaw sa mga pasahero.
“Bawal gyud nang kolorum kay dili man mapungan nga mag-operate sila. Ato na lang gihangyo mga mananakay nga ayaw sakay,” matod ni Galario.
Gipasabot niya nga ang mga pasahero nga makasakay sa mga kolorum nga sakyanan unya makasugat og aksidente, dili mabayaran sa operator lahi sa lehitimo nga PUVs.
“In terms of damages, alkanse ang atong riding public,” dugang niya.
Sigon niya nga ang mga kolorum nga sakyanan wala magbayad og buhis ug mga regulatory fee ngadto sa gobiyerno.
Ang “colorum vehicles” mga pribado apan namasahero ug walay mga permit hinungdan nga matawag kini og ilegal.
Matod ni Galario nga tungod sa Oplan Byaheng Ayos: Semana Santa 2025, sukad niadtong April 13, daghan nang kolorum nga sakyanan ang nadakpan sa LTO 7.
Kuwang sila sa gikinahanglan nga safety inspection, insurance, ug ubang regulations sa usa ka public utility vehicle.
Ang pag-operate og kolorum dunay multa nga pagkapriso sulod sa unom ka tuig ug multa nga moabot sa P2 million. / EHP