Ang mga lumulupyo sa Consolacion ug kasikbit nga mga lungsod makatagamtam na sa mas sayon nga pag-access sa mga serbisyo sa transportasyon pinaagi sa pag-abli sa bag-ong Land Transportation Office (LTO) extension branch sa SM City Consolacion.
Giinagurahan niadtong Lunes, Oktubre 21, 2024, ang bag-ong buhatan nga nagtumong sa pagpahapsay sa mga proseso alang sa mga lisensya sa pagmaneho ug pagparehistro sa sakyanan nga makapamenos sa kabug-at sa pagbiyahe ngadto sa lagyong mga sanga.
Modawat hangtod sa 100 ka mga transaksyon matag adlaw ug ang extension nagtanyag sa mga serbisyo sama sa mga aplikasyon sa bag-ong lisensya sa pagmaneho, pag-renew sa lisensya, ug pag-renew sa rehistrasyon sa awto diin naghatag sa mas dali ug mas sayon nga transaskyon sa mga residente ug bisita.
Ang bag-ong sanga kabahin sa padayon nga pagpaningkamot sa LTO 7 sa pagpalapad niini nga nagdala sa kinatibuk-ang ihap sa extension offices sa Sugbo ngadto sa 29 ug sa Bohol ngadto sa 10 nga adunay 39 ka mga sanga nga karon nagserbisyo sa tibuok Central Visayas region.
Ang inagurasyon sa bag-ong LTO extension office usa ka welcome development nga makahatag og dakong kaayuhan sa mga residente ug mga bisita nga makapasayon alang kanila sa pag-access sa importanteng serbisyo sa transportasyon. / CAV