NANGAYO og tabang ang Land Transportation Office (LTO) ni Mandaue City Mayor Thadeo “Jonkie” Ouano aron mapaspasan ang pag-release sa mga plaka sa sakyanan.
Kini ilabi na alang sa mga unit ubos sa Tricycle Operators and Drivers Association (Toda) nga narehistro niadtong 2017 paubos apan wala pa makadawat sa ilang opisyal nga mga plaka.
Matod ni LTO Region 7 Director Glenn Galario, liboan ka mga plaka ang anaa na sa mga opisina sa LTO sa tibuok rehiyon apan daghan pa ang wala makuha ilabi na kadtong alang sa mga tricycle nga nag-operate ubos sa Toda.
Si Galario nihimo og courtesy call sa opisina ni Mayor Ouano niadtong Miyerkules, Hulyo 30, 2025, aron mohangyo og tabang sa pagkolekta og mga rekord sa sakyanan lakip na ang mga engine number ug MV (motor vehicle) file number.
“Ang uban sa atong mga Toda units hangtod karon walay plaka. Naa na sa LTO ang mga plaka pero wala pa ma-claim. Nangayo mi og tabang sa City Hall para ma-trace ang mga tag-iya,” matod ni Galario.
Giklaro niya nga samtang wala nay production backlog alang sa mga plaka, ilabi na alang sa mga rehistrasyon sa 2017 paubos, ang hagit karon anaa sa distribusyon ug pagkuha sa impormasyon sa tag-iya. Dugang pa, duna pay pipila ka plaka nga gipadala gikan sa Manila paingon sa Region 7.
Karong tunga-tunga sa Agusto, ipatuman na sa LTO ang polisiya nga “No Plate, No Travel.”
Giawhag ni Galario ang mga motorista nga naggamit pa og temporaryo nga mga plaka nga mobisita dayon sa labing duol nga opisina sa LTO aron masusi ang status sa ilang plaka.
Mahimo sab nga susihon sa mga tag-iya sa sakyanan ang LTO tracker sa ltotracker.com aron mahibaw-an kon available na ba ang ilang plaka.
“Walay rason nga dili nila makuha ilang plaka. Ang among mandato, dapat ma-release ni tanan before October 31,” panapos ni Galario. / CAV