Nisang-at og managlahing mga kaso sa disqualification si Ormoc City Mayor Lucy Torres Gomez sa Commission on Elections (Comelec) niadtong Mayo 8, 2025, batok kang kanhi representante ug kanhi justice Vicente Sofronio E. Veloso III kinsa magpapili pagka representante sa ikaupat nga distrito sa Leyte ug Matag-ob, Leyte ug Mayor Bernandino G. Tacoy kinsa magpapili pag-usab karong umaabot eleksyon sa Mayo 12, 2025.
Ang gibasehan sa petisyon alang sa diskwalipikasyon mao ang paglapas sa Section 68 (e) kalabot sa Section 261 (e) sa Omnibus Election Code, nga nag-ingon: "Section 261 (e) Threats, intimidation, terrorism, use of fraudulent device or other forms of coercion. – Any person who, directly or indirectly, threatens, intimidates or actually causes, inflicts or produces any violence, injury…"
Ang ebidensya nga gipresentar sa kaso ni Tacoy usa ka Facebook video niya nga nakakuha og 9,900 views. Sa maong video, siya nagkanayon, “Sa eleksyon, bahalag magpinatyanay ta, ug gusto mana ninyo, basta ang pagserbisyo sa mga tawo atong ayuhon. Pero inig eleksyon ug gusto ninyo ilugon ang Matag-ob aw magpatay ta, kon unhan ko ninyo.” (In the election, it doesn't matter if it comes down to bloodshed, if that's what you want. But let's commit to serving the people better. But in the coming election, if you want to take Matag-ob, blood will spill if you provoke me).
Sa habig ni Veloso, usa ka video sa kanhi justice ang makita sa Facebook, diin siya miingon, “Kini timan-an nila, kay gipakatug lang nako ang panuway karon sa akong lawas. Pero before kay kada adlaw musimba jud ko, ayaw pukawa ang panuway kay lisod, pero ug mapukaw man gali ang panuway sa akong lawas ug kinahanglan ko mupatay, oy mupatay ko.” (This is what they need to remember, because I am just putting the devil to sleep inside my body. Before I used to go to mass daily. But don't make any effort to awaken the devil, and if the need arises for me to kill, I will kill).
Ang duha ka mga video nakahatag og kahadlok sa daghang mga residente sa Leyte 4th district. Dugang pa, ang duha ka mga binuhatan ni Tacoy ug Veloso nakalapas sa Section 4 (a) sa Anti-Terrorism Act of 2020. Ang SuperBalita bukas sa pagdawat sa habig nilang Veloso ug Tacoy kalabot sa maong pasangil. /