Niduso og petition for disqualification si incumbent Ormoc City Mayor Lucy Torres-Gomez ngadto sa buhatan sa Commission on Elections (Comelec) batok sa mayoral candidate sa Lungsod sa Albuera, Leyte, Rolan ‘Kerwin’ Espinosa, niadtong Martes, Mayo 6, 2025.
Base sa petisyon ni Torres-Gomez nga ang basehanan sa iyang reklamo mahitungod sa kalapasan sa Section 68 (e) kalabot sa Section 261 (e) sa Omnibus Election Code nga naglangkob sa pagpanghulga, pagpanghadlok, terorismo, paggamit og limbong nga paagi o ubang paagi sa pagpamugos.
Ang maong reklamo may kalabutan niadtong Facebook live video ni Espinosa nga pinetsahan niadtong Abril 30, 2025, nga nakakuha og 900 ka live views.
Ang maong Facebook live nilanat ngadto sa 40 minutos ug 15 segundos diin gihagit ni Espinosa og pinusilay o duwelo ang bana ni Mayor Lucy nga si Leyte 4th district Rep. Richard Gomez.
Base sa maong video, si Espinosa namahayag: “Magpinusilay ta! Reperi nato ang mga polis ug army. Pagsulti og asa ta mag-abot, magpirmahay tag waiver, way kihaay, gubat ta, gamita nang kusog nimo nga armas.”
Ang maong Facebook live video ni Espinosa nitumaw human siya gipusil atol sa iyang pangampanya sa Barangay Tinag-an, Albuera, niadtong Abril 10, 2025.
Nasamdan si Espinosa ug laing duha sa maong hitabo.
Tungod niini, ni-file ang kampo ni Espinosa og kasong frustrated murder batok sa pito ka mga polis nga sakop sa Ormoc City Police Station nga giingong suspek sa maong pagpamusil. / FVQ