Isip selebrasyon sa ika-60 ka tuig nga milestone sa Academia De San Jose, mopahigayon kini og fun run nga gitawag og ECOLOR Fund Run sa Enero 27, 2024, sa Academia de San Jose campus sa dakbayan sa Mandaue.
Pormal nga gilusad ang maong kalihukan pinaagi sa press conference nga gisalmutan nila ni Mia Amor Esmeralda, parents-personnel association treasurer; Joel Juarez, race director; Fr. Conrado Sedillo, Jr., basic education principal; ug Leah Bukiron, school alumni representative.
Ang maong paugnat sa kusog adunay tulo ka mga kategoriya: 10K, 5K ug 3K.
Tumong sa maong lumba ang pag-promote sa environmental consciousness ug fund raising alang sa school facility.
Lakip na sa registration ang race shirt, finisher’s medal, race bib, seedlings ug snacks. Mahimo’ng magparehistro sa Academia de San Jose School ug Runner Store Ayala.