Sugaton ang mga estudyante sa Sugbo sa nindot nga panahon atol sa opisyal nga pagsugod sa klase sa Hunyo 16, 2025.
Gikumpirmar sa Philippine Atmospheric, Geophysical and Astronomical Services Administration (Pagasa) niadtong Martes, Hunyo 10, nga ang usa ka tropical depression nga gibantayan gawas sa Philippine Area of Responsibility (PAR) nagpalayo na.
Si Jhomer Eclarino, usa ka weather specialist sa Pagasa Visayas, nipahibalo atol sa usa ka news forum niadtong Martes, Hunyo 10, 2025, nga samtang ang usa ka low-pressure area (LPA) nakaapekto sa Central Visayas nagdala og kusog nga ulan ug pagbaha sa Metro Cebu sa miaging semana, ang grabe nga pagbundak sa ulan ug mga pagpanugdog molungtad karong adlawa, Miyerkules, Hunyo 11.
“Mabalik ang init-init sa Thursday, much improved ang panahon kay palayo na ang tropical depression,” matod ni Eclarino.
Sigon niya, mas init ug mas klaro nga kahimtang sa panahon sa umaabot nga mga adlaw, ilabi na sa panahon sa pag-abli sa klase alang sa School Year 2025-2026 sa mga publikong eskwelahan sa tibuok nasod.
Samtang gipahibalo sa Provincial Disaster Risk Reduction and Management Office (PDRRMO) ang mahinungdanong papel sa publiko sa pagkunhod sa risgo sa baha.
Si Wilson Ramos, tigpamaba sa PDRRMO, nipahayag sa samang forum nga ang ilang opisina kanunay'ng nagbantay sa local government unit (LGUs) ug nagpahigayon og pre-rainy season clearing operations sa mga drainage.
“Bisag unsaon pa nato pag-desilting, pero kon pataka la'g labay og basura ang katawhan, wala gihapo'y gamit,” matod ni Ramos.
Iyang nga giawhag ang publiko nga mahimong responsable sa ilang basura aron malikayan ang pagbara sa mga agianan sa tubig ug kalit nga pagbaha.
Dugang pa ni Ramos nga ang mga LGU kompleto og high-frequency communication devices aron masiguro ang padayon nga komunikasyon atol sa mga kalamidad. / Divine Grace Bendanillo, CNU-Main intern