Ang mga botante sa Sugbo nga adunay espesyal nga panginahanglan, hatagan og higayon nga makauna sa pagbotar atol sa nasyonal og lokal nga eleksyon karong Lunes, Mayo 12, 2025.
Gitakda sa Commission on Elections (Comelec) ang sayo nga oras sa pagbotar gikan sa alas 5 sa buntag hangtod sa alas 7 sa buntag alang sa senior citizens, persons with disabilities (PWDs) ug mga mabdos.
Kini nga inisyatiba sa tibuok nasod nagtumong sa paghatag og mas luwas, hapsay ug mas dali nga kasinatian sa pagbotar.
Si Carcar City Election Officer Omar Sharif Mamalinta, sa pakighinabi sa mga tigbalita ug editor sa SunStar Cebu niadtong Dominggo, Mayo 4, niingon nga ang early voting period maoy kabahin sa ilang paningkamot nga mahimong mas inklusibo ug konbenyente ang eleksyon alang niadtong naglisod sa taas nga linya o standard voting hours gikan sa alas 7 sa buntag hangtod sa alas 7 sa gabii.
Magpabiling bukas ang mga priority lane sa tibuok adlaw alang sa eligible voters nga dili makabotar og sayo.
Ang mga escort sa PWDs, senior citizens ug mabdos, mamahimong modungan nila og botar.
I-set up usab ang Priority Polling Places alang niadtong mga botante nga dili makasaka sa taas nga andana.
Ang voters’ assistance desks nga dumalaon sa mga boluntaryo, ibutang sa gawas sa mga presinto aron matabangan ang mga botante sa pagpangita sa classroom diin sila mobotar.
Mopagawas usab ang Comelec og bag-ong automated counting machines (ACMs) gikan sa Korean firm nga Miru Systems.
Mao kiniy mopuli sa Smartmatic machines nga gigamit sukad niadtong 2016.
Ang mga ACM adunay 14 inches nga touchscreen display, usa ka privacy screen, ug baterya nga molanat og sobra sa 14 ka oras.
Ang function niini naglakip sa voter’s receipt printing, on-screen ballot review, result generation and transmission, digital signing ug audit reviews. / CDF