Mabolo police gipasidunggan kay pagpatay nasulbad dayon

 PASIDUNGOG: Si Cebu City Police Office (CCPO) chief Col. Ireneo Dalogdog (wala) nipasidungog sa Mabolo police, pinangulohan ni Police Major Eraño Regidor (wala), sa pagkasikop sa suspek ug pagkasulbad sa pagpamusil sa mga menor sa Brgy. Mabolo sa miaging semana. / ARNOLD Y.  BUSTAMANTE
PASIDUNGOG: Si Cebu City Police Office (CCPO) chief Col. Ireneo Dalogdog (wala) nipasidungog sa Mabolo police, pinangulohan ni Police Major Eraño Regidor (wala), sa pagkasikop sa suspek ug pagkasulbad sa pagpamusil sa mga menor sa Brgy. Mabolo sa miaging semana. / ARNOLD Y. BUSTAMANTE

Gipasidunggan sa hepe sa Cebu City Police Office (CCPO) ang Mabolo Police Station tungod sa daling pagsulbad ug pagkasikop sa suspek sa pagpamusil sa Sityo Sta. Cruz, Barangay Mabolo, Biyernes sa kaadlawon, Disyembre 29, 2023.

Ang pagpamusil niresulta sa kamatayon sa 15 anyos nga si Winston Miles Canada, taga Sityo Lahinglahing, Barangay Mabolo ug pagkaangol sa 13 anyos nga lalaki nga taga Sityo Magtalisay. Ang suspek dali nga nadakpan sa kapulisan sa Mabolo Police Station, ubos sa pagpangulo ni Police Major Eraño Regidor, sa gilusad nga manhunt operation nianang Biyernes sa hapon.

Ang suspek giila nga si Dante Fernandez, alyas Dansoy, kinsa sa sayo pa giingon nga menor.

Siya nasikop sa kapulisan sulod sa Ludo Cemetery, Barangay Carreta, dakbayan sa Sugbo.

Matod ni Police Colonel Ireneo Dalogdog, hepe sa CCPO, nga dako og natampo sa kasulbaran sa krimen mao ang kooperasyon sa katawhan nga nitudlo sa gipuy-an ni Fernandez.

Nagpasalamat si Dalogdog sa publiko nga padayon ang pagsalig ug pagsuporta sa kapulisan sa siyudad.

Ang pagpamusil ni Fernandez sa mga menor nakuha sa closed circuit television (CCTV) camera kansang kopya naa na sa mga kamot sa kapulisan.

Nakita sa CCTV nga nagsakay si Fernandez og motorsiklo dihang iyang gigukod ang grupo nila ni Canada human sa usa ka disco.

Ang suyaay sa mga grupo sa mga batan-on atol sa disco maoy natumbok nga motibo sa pagpamusil.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph