Usa ka maestra sa usa ka pribadong tunghaan, lakip ang iyang live in partner nga nabutang sa target listed individual sa Philippine Drug Enforcement Agency (PDEA 7) ug Cebu Police Provincial Office, nadakpan sa buy-bust, alas 10:40 sa gabii sa Huwebes, Abril 25, 2024, sa Brgy. Babag 2, dakbayan sa Sugbo.
Ang nadakpan nga private school teacher giila nga si Maribel Arcilla, 31, ug ang kapuyo nga si Rey Mark Rabasano, 23, way trabaho, pulos taga Sitio Highway, Pung-ol Sibugay, dakbayan sa Sugbo.
Nakuha sa mga operatiba ang mga pinutos sa gituohang shabu nga motimbang og 15 gramos nga dunay estimated market value nga P102,000, buy-bust money, cellphone ug motorsiklo nga maoy gigamit sa ilegal nga negosyo.
Matod ni Leia Alcantara, information officer sa PDEA 7, nga duha ka buwan nila nga gipaubos sa case build up ang duha human makuha ang impormasyon gikan sa kasaligang tinubdan nga maka dispose kini og 100-300 grams matag semana.
Human mapaubos sa case build up, gilusad dayon sa PDEA ug CPPO uban sa Mabolo Police Station 4 ang buy-bust.
Kasong kalapasan sa Republic Act 9165 kun Comprehensive Dangerous Drugs Act of 2002 ang ipasaka batok sa duha ka mga suspek nga nabilanggo na karon. / AYB