Nakurat ang amahan sa dihang iyang nadiskobrehan ang iyang anak nga maestra nga patay na sud sa panimalay sa sudlunon nga bahin sa Barangay Giloctog, lungsod sa Barili, alas 9 sa buntag, Lunes, Oktubre 21, 2024.
Si Jaime Canoayon Flores nitaho sa kapulisan sa Barili sa pagka alas 11:20 na sa buntag sa Oktubre 21, 2024, hinungdan nga giimbistigar kini sa kapulisan ubos sa kamanduan sa ilang hepe nga si P/Capt. Gerald D. Casame.
Ang biktima giila nga si Arlyn Apawan, 38, minyo, ug usa ka magtutudlo sa Giloctog National High School sa Brgy. Giloctog, Barili.
Sumala sa kapulisan, ang maong biktima gideklarar sa doktor sa Rural Health Unit (RHU) Barili nga Dr. Michelle Ann Dagoy nga namatay gumikan sa pagkakuryenti niini.
Sumala sa asoy sa amahan sa biktima, ang iyang anak nag-inusarang nagpuyo sa iyang balay sa Oktubre 20, 2024, ug pagka Oktubre 21, 2024 sa alas 9 sa buntag, niadto siya sa balay sa iyang anak aron pagkuha sa bag sa 5 anyos nga anak niini.
Apan dako niyang katingala kay iyang kining nakit-an nga wa nay panimuot nga naghagba na sa hawanan sa balay ug ang tuong kamot nagkupot pa sa socket nga naka-plug pa sa electrical outlet hinungdan nga nangayo siya'g tabang sa mga silingan aron ila kining tabangon apan patay na kini. / DVG