Naangol ang usa ka maestra human nadasmagan og sakyanan atol sa iyang paglabang alas 4:30 sa kaadlawon Miyerkules, Hunyo 4, 2025, sa National road, Barangay Sabang, Dakbayan sa Danao.
Si Keen Cheryl Hermosilla, 29, dalaga usa ka private school teacher, taga Purok 4A, Catadman, Barangay Sabang, Danao City, naa sa pribadong tambalanan sa Dakbayan sa Sugbo.
Gitanggong sa Danao Police Station ang nakadasmag nga si Jonatahan Sentillas Icot, 41, minyo, negosyante og butong, taga Barangay Pusok, Siyudad sa Lapu-Lapu.
Si Police Master Sgt. Gerome Pesidas, imbestigador sa Danao Police Station nga nahinabi sa Sunstar
Superbalita niingon nga nagmaniho si Icot sa iyang Isuzu Elf padulong sa Norte nga bahin sa Probinsiya sa Sugbo kay mangumpra og butong.
Ang biktima nga maestra padulong nga mo-duty sa iyang trabaho sa Dakbayan sa Sugbo ug sa iyang paglabang sa national highway, wala makabantay ang driver hinungdan nga kini nadasmagan.
Sa kakusog sa impact, nalagpot ang maestra ug nakaangkon og seryusong kadaot sa kalawasan nga dali siyang gidala sa tambalanan sa Danao apan gibalhin siya sa tambalanan sa Dakbayan sa Sugbo sa grabing pagkaangol.
Giandam na sa kapulisan ang kasong reckless imprudence resulting in serious physical injury batok sa suspek. / GPL