Maestro nga nagmotorsiklo padulong sa Guadalupe Elementary School sa Brgy. Guadalupe, Dakbayan sa Sugbo, nadasmagan sa laing motorsiklo alas 6 sa buntag, Miyerkules, Mayo 29, 2024.
Giila ang biktima nga si Galileo Caratao, Grade 4 adviser sa naasoy nga tunghaan, gidali sa pagdala sa tambalanan tungod sa bun-og sa kalawasan ug nihuboy ang ibabaw sa walang mata.
Gikataho nga ang biktima nag-signal sa iyang Honda Airblade aron moliko sa wala ngadto sa eswkwelahan apan nadasmagan sa naghaguros nga Suzuki Raider 150 nga motorsiklo nga gimaneho ni Marvin Alfanta, 32, minyo, taga Oprra Road, Brgy. Kalunasan, dakbayan sa Sugbo.
Si Alfanta mopauli na sa ilang balay gikan nipalit og isda sa Carbon Public Market ug niangkon sa Superbalita Cebu nga kusog ang iyang pagpadagan kay nag-apas sa pag-uli.
Matod niya, nagbusina siya aron pagpasidaan apan, dason niya, ang naulahi nipadayon sa iyang direksyon nga niresulta sa pagkabangga.
Samtang, wa makuha sa Superbalita Cebu ang habig sa biktima sanglit sa pagkuha ning taho gikarga na siya sa ambulansya. / GPL